Acts 1

Jisas ulɨmento, Nje Towahuno Wopɨngoso sekuyepono wolɨhwatɨmonnoho.

1Nje Tiyoufilos sohwosi, ngko Lukɨ'ni mtɨ'mokalokweno. Iyoswo sɨmo'mjo kikimne'no mtɨ'mokumentoheso ole, Jisas kakoe hungkuno lutɨhwanto kakoe syohoso nomjɨmɨwento ahwomomo sɨmentisofoho. Oso'no ifalifaliyo nto mtɨ'mokumentohefoho. Hungkuno songoso olenoho. 2Jisas Kako ahwomomo masiyo sohonta kako Anɨtuye Towahuno'nji nohumanto kakoe a'amuapousel uhwosopo'mentiso sohwamo oso hungkunoso yo'mayo syoho ifitnne'ento ulɨmentisofoho. 3Jisas poyo pe'nonto apa'no songo lɨka'mentiso sohonta kako yo'mayo wonyoangkafo yontanɨngkofi sɨkunofouti (40) memjao'mentisofoho. A'amu huhwo sohwa ose nuhwonontɨfi ole syafɨhu'mentohofi, Ou, Jisas songo humayoso nehopeho. Huno ose uyɨmentisofoho. Jisas nohumanto Anɨtu nakumo yokumpohn'nyo enemokosyohumane so'no lutɨhwamentisofoho.

4Sɨkuno fihwi Jisasɨye inomokomoyo sohwa Jisasɨ'nji nuhu'mokontɨfi Jisas ole ulɨmento, Nonje nonje humpekutoho. Jelusalemnohini fosyohumantokuno. Oso hiso Anɨtu kako sejapone so'no nto selɨmentohe so'no fohontohumantokuno. 5Joun a'amumo mijo kiyoma'mojo sohwo mijo'nohino kiyoma'mojofoho. Sɨkuno mofonepo Anɨtuye Towahuno wosehula'o'montonoho. Ose ulɨmentisofoho.

6Apousel sohwa Jisasɨ'nji uhu'mokumentohofo so'no Jisasɨmo ulohonɨmentohofi, Hwe Engo sohwosi, olohonta nakwo a'amu Jutajo hn'nwi nakwo mokosyohumunane'no wonamokumonntaho. Nakwoe yofe Isɨlael engo umo'nɨmontolaho.

7Ose ulahonɨngkofi Jisas ulɨmento, Oso sɨkuno hiso sekwo huno maseyohoyohoho. O'o, Mpohwo Anɨtu oso sɨkuno hiso ho'nahumentisofoho. Kako'nohini mokosyohumaho. 8I oso'no Anɨtu kakoe Towahuno Wopɨngo sekumo sehula'ofoso sohonta kakoe yokumpohn'nyo nomafɨkuji nje hungkuno sekwo nomotakuji a'amu hopi'nonohino somo filutɨhwafɨkuno. Pone Jelusalemne'no, hwaho Jutiya hopi'nonohino ne'no, hwaho Someliya ne'no ango yawojo'meemo filutɨhwafɨkuno.

Jisas ahwomomo sɨmentisofoho.

(Mak 16:19-20; Luk 24:50-53)

9Oso hungkuno hiso Jisas ulahonɨngki a'amu sohwa uhwontohumentanɨngkofi kako ahwomomo sɨmentisofoho. Nosontanɨngki himo a'amufe tɨmomo uhoholo'mentisofoho. 10Hofɨko ahwomomo tɨmo huno honamofontɨfi hwe manji'mofo halojo'njo hufa'u sohwa'u hofɨko'nji lohofonji ulɨmentisi. 11Sekwo a'amu Ngkalilinta'ango soku, nolohofontɨfi ahwomomo peho'no uhwontohumalofo. Anɨtu nto utɨmakwoho. Oso hwe huhwo sohwo sekwo olohonta uhwonɨngkohofo pa'nyoso hwangku asomo noponefoho. Ose ulɨmentisiyefoho.

Hofɨko Jutasɨye syohomne'no hwe fihumo uhwosopo'mentohofofoho.

12Oso hwofɨki'nyo Oulif sopo nta'ni nokotapontɨfi Jelusalemno umentohofofoho. Ikanopo'maho. O'o, tɨfoneponoho. A'amu Jutaso sɨkuno iyoho humayo osomno hofɨko hano tɨfonepo emmotofoso pa'nyoponoho. 13Jelusalem i'mofapontɨfi ango tokilonjwa'mo molinyo somo humamentohofo sopo kotasɨmentohofofoho. Oso a'amu huhwo sohwafe yofe ole, Pitaja, Jounja, Jemɨsɨja, Entɨluja, Filipɨja, Toumasɨja, Mpatoulomɨyuja, Matɨyuja, Alɨfiyosɨye hwomu Jemɨsɨja, Saimoun Seloutɨja, Jemɨsɨye hwomu Jutas sohwanjoho. 14Hofɨko sɨmeho afa'nohino inontɨfi Anɨtune'no jomo ulɨwo'nɨmentohofofoho. Moya'mi sofa Maliya Jisasɨye kona'wohi'nji konɨngkwa'wehwosanji hofɨko'nji Anɨtune'no jomo ulɨwo'nɨmentohofofoho.

15Hofɨko Anɨtumo jomo ulontanɨngkofi sɨkuno fiso memjao'mentisofoho. Sɨkuno fihumo a'amuwan hantɨlet tɨwenti (120) Jisasɨmo inɨngkamotofoso nohumentanɨngkofi Pita nolɨkafonto ulɨmento, 16Nje a'amu soku, hohonta Anɨtuye Towahuno sohwo kakoe mampaho Ntefitɨye sɨmehomo'mo ho'nosyahonɨngki Ntefit oso hungkunoso mtɨ'mokumentisofoho. Oso hungkuno hiso ne imo'nyo'nefoho. Jutas kako Jisasɨmne'no tokoyo'ofo imentisofoho. Oso'no Ntefit mtɨ'mokumentisofoho. Olohonta oso hungkunoso ne imo'nɨmasofoho. 17Jutas nakwo'nji humamojo hweho. Nakwoe syohoso afa'enohinoso Jisas nahwosopo'mentisofoho.

18Jutas huhwo sohwo kakoe wonyo so'ne hamniyoho nomanto hwaho mpe yonto osopo mnokino ki'mo lohofonto pɨwahu'mentisofoho. Nopɨwasyonto kakoe sɨmeho fongkulo lohofonto yo'mayoso hu'mewahu'mentisofoho. 19Oso hungkuno hiso ho'nɨngkahonɨngki a'amu Jelusalem mta'angoso nupa'nontɨfi oso hwaho hopo sopono mulɨmentohofi, Akelɨtamanoho. Hopo sopone yofe yɨwolo'mo ole, Hwaho jahino'njoponoho.

20Hohonta Ntefit olo hungkuno loso Ta'njo Iyoswomo mtɨ'mokumentisofoho. Hungkuno ole,

Kakoe angoso siki wawentɨhwono.
A'amu fihwo nohumayo'eno.
Nom'ne hungkuno ta'njoso ole mtɨ'mokumentisofo,

Hwe nom'nehwo kakoe syoho womano.
21Oseso Jutasɨye syoho mayoso'no nom'ne hwe fihumo uhwosopehwasi kako nakwo'nji Jisas songo lɨka'mentiso so'no wolutɨhwantanoho. Olo hwe huhwo lohwo kako nakwo'nji Jisasɨ'nji nohumentanɨngki Joun a'amumo mijo kiyoma'mentiso sohonta Jisas kakoe syoho ema'mentisoso oso syoho mjɨmɨwento osohonta Anɨtu Jisasɨmo utɨma'masofoho. Oso hopi'nono uhwonɨwo'nɨngkiso sohumo nakwo uhwosopeeno.

23Pita ose ulahonɨngki a'amuso hwe hufa'u hwa'u uhwosopo'mentohofofoho. Hwe anga'no kakoe yofe Jousep Mpasopas, nom'ne yofe mulɨmotofoso Josɨtosɨyoho. Hwe nom'ne sohwo kakoe yofe Matiyas. 24Oso hwa'umo uhwosopentɨfi Anɨtumo jomo ulɨmentohofi, Hwe Engo, a'amu hopi'nonohinofe sɨmehomo huno kiyohoho. Olo hwe uhwonalokune lohwa'u ntisohumo uhwosopeenehwono. 25Oso hwe huhwo sohwo Jutasɨyeapousel syoho womano. Syoho hiso Jutasɨmo kɨko uyahonɨngkini Jutas syoho wopɨngoso ulɨko'manto nɨhu'nahone tɨkanomo umentisofoho. 26Anɨtumo ose ulontɨfi hofɨko sojo we'e so'nji syohi'nyo yontɨfi Matiyasɨmo uhwosopo'mentohofofoho. Hwe huhwo sohwo kako Jisasɨyeapousel aho hopi'nono sɨfe mta'ni anga'nohino sohwanji humamotofofoho.